يا جماعة، لو كنت مرتبطة بحد قبل كده، وأنا وقتها كنت صغيرة ومش فاهمة، ومكنش فيه أي كلام أو حاجة غلط، يعني مجرد ناس كانت مرتبطة. وطبعًا كان عنده صور عادية ليا، زي: "إنتِ فين؟" أو صور برا، أو ستوريهات، أو أي صور كنت بنزلها عادي، أو صور كنت بتصورها لنفسي. مفيش فيها أي حاجة غلط والله. وأنا عارفة إن الارتباط نفسه كان غلط وإنه مينفعش، لكن ده اللي حصل، والحمد لله ربنا هداني، وبجد بعدت عن كل ده. ولما بعدت حتى ما قلتلوش امسح الصور أو أي حاجة، لأني قفلت الموضوع تمامًا وعرفت إنه حرام، ومبقاش بينا أي تواصل، ونسيت أصلًا موضوع الصور. وبأكد تاني إن الصور عادية جدًا جدًا، لكن مع الذكاء الاصطناعي دلوقتي مبقاش فيه حاجة مضمونة. ولسه شايفة بوست لواحد بيقول إنه بعد الجواز بشهرين اتفاجأ إن حد بعتله شاتات وصور لمراته مع شخص كانت مرتبطة بيه قبل كده. وهو كان سألها قبل الجواز إذا كان فيه حد في حياتها وقالت له لا. المهم إنه كان عايز يطلقها وينتقم منها. الفكرة إن كل الكومنتات وردود أفعال الرجالة صدمتني جدًا، من نوعية: "قول لأهلها"، و"خليها تتنازل عن حقوقها"، و"لو حامل تتنازل عن حضانة العيال"، و"فضيحة ليها ولأهلها"... والكلام ده كله. أنا بجد زهقت، وربنا ما يوقع أي حد في موقف زي ده، لكن خوفت جدًا. بقالي من ساعة ما قريت البوست والكومنتات بفكر: هل ممكن يحصل معايا حاجة زي كده؟ وهل أحاول أوصل للشخص ده تاني وأقوله يمسح الصور؟ ولا أسيب الموضوع زي ما هو؟ أنا والله سيبت كل ده وتبت منه، ومش عايزة أي حاجة غلط، لكن البوست والتعليقات خوفوني جدًا.