امبارح دخلت الفصل، لقيت تلت بنات قاعدين مكاني. فاا قلت خلاص، ورحت قعدت ف صف تاني. وقتها معرفتش اقعد والله؛ الصف الي ف النص ده مكس ولاد وبنات، ده غير ان انا عندي مشكلة معينة، وماما منبهة عليا اني اقعد ساندة بظهري، ف كنت بسند على الحيطة لو انا ف مكاني العادي، ومعرفتش بقى وانا ف الصف ده. فاا انهاردة، لقيتهم برضو مكاني، وانا مكنليش خلق بجد اعديها لحد، خصوصا اننا مثبتين اماكننا، وانا عندي مشكلة فعلا مش شغل عيال حضانة، لأ انا ظهري كان بيموتني امبارح. ف قولتلهم قوموا، وان ده مكاني وانا مبعرفش اقعد ف النص ووو... بنت منهم كان اللي بترد عليا، وبوقاحة وقلة ادب بجد ف الاسلوب ونظرتها ليا. قالتلي يعني ايه مبتعرفيش تقعدي ف النص؟ وبعدين ده مش مكتوب عليه اسمك، واحنا تلاتة مش هنعرف نقعد ف النص عشان عايزين نقعد جنب بعض. طب انا مال اهلي انتوا تلاتة ولا عشرة؟ ما تقسموا نفسكم على ديسكين، مش مربوطين يعني بالحبل السري خلاص! مقولتش كده عامة، بس لما لقيتها مكملة بجاحة، رحت للمس قولتلها فيه كذا وكذا، فاا المس قومتهم غصب، وهزأت البنت دي جامد، والبنت من قلة ذوقها قالت وهي قايمة "ايه الخرا ده". انا اصلا استغربت والله، ورزعت الشنطة لما قاموا ونظراتي كلها قرف. بمجرد ما قعدت، فتحت تلفوني اعمله سايلنت واحذف التطبيقات المفتوحة ف الخلفية، ف نفس الوقت كانت البنت نفسها باصالي وقالت بعلو صوتها للمس "اه يعني هو عادي نمسك التلفون ف الفصل مش كده؟"، ف المس بصتلي، وانا كنت اوريدي قفلته، ف هزأت البنت وشتمتها، ف قالت هي والله لنازلة قايلة للمديرة وخرجت ورزعت الباب وراها. المهم، كم دقيقة كده، ولقيتها داخلة مع الوكيلة بتشاور عليا، وبتقول "البت دي" كانت ماسكة التلفون. انا تلقائيا قمت من مكاني لعندهم، والمس قالت للوكيلة انو البنت بتعمل الحوار ده كله عشان بدلت اماكننا، والوكيلة والمس ما شاء الله الاتنين بيهزأوا فيها، وهي اصلا مجابتش سيرة الهبل اللي عملته، هي بس عايزة تقول اني فاتحة التلفون ف تعملي مشكلة، والمس اصلا بتكذبها لانها مشافتنيش، وهي تحلف وتبرق وكان حوار. انا عشان ابرر سوء الفهم ده، والامر كده كده مش هيفرق معايا عشان فيه كاميرات تؤيد كلامي واني قفلته ف وقتها، ف قلت للوكيلة اني فتحته عشان بس اعمله سايلنت، ف المس قالتلي خلاص عادي، روحي اقعدي. فاا قعدت، والبنت والله لسه واقفة والوكيلة ماسكاها تهزيق قدام الفصل كله. بعد م خلاص قعدنا وبدأت الحصة، البنت والله وصحابها متنحين فيا تتنيحة، والبنت دي بالذات، وكل شوية تشاور عليا وتتكلم وتضحك، وانا حقيقي مكنتش مبسوطة ولا مختلة ف ابصلها بشماتة، لا انا كنت عادي خالص والله، بل بالعكس انا اصلا كنت دمعت. المهم، لقيتها بتكلم البنت اللي ورايا وبتسألها اذا كانت غلطانة ولا لا، والبنت قالتلها انو اه، وقعدت بجد تهزر معايا كتير اوي وتلعب ف هدومي، وكذا حد مش هي بس يهزر معايا، رغم اني هادية اوي ومفيش بيني وبينهم غير السلام. المهم، ف آخر اليوم، كنا خلاص ع الباب وخارجين، ف جم جنبي بنتين، وانا فاتحة الفيس بس منتبهة لان واحدة منهم باصالي، ف لما طولت قفلته وبصيتلها، ف لقيتها بتقولي انتي لسه زعلانة من فلانة؟ ابتسمتلها وقلتلها لا لا والله عادي حصل خير، ف قالتلي ده انا بهدلتلهالك والله، ف انا ابتسمتلها، ف التانية بتقولي انتي مسمعتيش؟ قولتلها لا والله، ف قالتلي دي بجد بهدلتها، ف متزعليش بقى خلاص. والله انا من كتر الكياتة معرفتش حتى اقول شكرا، ابتسمت وخلاص. كنت بحكي الموقف لحد كوتي بوتي اعرفه، ف قالي ربنا بيبعتلك ناس تطيب بخاطرك عشان انتي حد جميل، ف خلاص بقى انا هموت من السعادة انهاردة 💕✨️.