عليا امتحان لماده سهله وعارف انها سهله والدكتور قال كمان متقلقوش ، وانا مذاكرها قبل كدا وسامع كل المحاضرات مره تانيه ومبيض ورا الدكتور وملخص تلخيص عامله لنفسي كمان ، وبالرغم من دا قاعد متقدر ف ليله الامتحان وبذاكر زي اللي مذاكرش خالص ولا فتح الماده ، حاسس اني محبوس جوا دماغي وجوا المعتاد ، مدام الامتحان بكرا يعنني ذاكر جامد حتى لو مذاكر تاني ، المشكله اني بتدايق جدا ان بعد المجهود دا كله بلاقي ان معظم الامتحانات سهله واللي مذاكرش غير ليله الامتحان بيحل وطالع مبسوط ، واللي اصلا مش بيحضر حل ، واللي مش بيفهم الماده ده حل ، ف بندم على المجهود اللي بعمله وبتدايق جدا ، وف نفس الوقت مش عارف اخد قرار حازم واقول اني خلاص مذاكر ، حتى وانا براجع كل المعلومات عارفها بس برده الشك ماسك فيا ، والشك ده للاسف ف معظم جوانب حياتي بس الفتره ده عشان امتحانات ف بعاني منه فالنقطه ده بالتحديد ، وياعالم بعد الامتحانات هيطاردني ف انهي مكان تاني
وإحسن حاجة المواجهة، جرب تروح مرة الامتحان من غير ما تذاكر أي مذاكرة زيادة عن اللي انت ذاكرته وقت المحاضرات وهتلاقي انك عرفت تحل بإذن الله لأنك عارف ومذاكر قبل كده، وده في كل حاجة في حياتك وأي حاجة تخاف منها اسأل نفسك سؤال "إيه أسوء حاجة ممكن تحصل؟" ومهما كانت الإجابة حاول تلاقيلها حل أو تصغرها في عقلك يعني مثلا أسوء حاجة منطقية ممكن تحصل لو رحت من غير ما تراجع ليلة الامتحان انك تنقص كذا درجة (مستحيل تكون مذاكر قبل كده وتسقط) وإيه أسوء حاجة هتحصل لو نقصت كذا درجة؟ وهكذا .. في الآخر هتلاقي الموضوع لا يستحق تعبك النفسي ده، وعموما عود نفسك أي حاجة مش هتجيبلك سيئات يبقى أمرها
لو نمت خلاص اظبط التايمر على ١٠ دقايق وقول لنفسك أنا هسيب المذاكرة ١٠ دقايق بس وهرجع تاني وروح افتح بودكاست بيتكلم عن حاجة انت مهتم بيها وافضل قول لنفسك كمان ١٠ دقايق هوقفه وهرجع وهكذا لحد ما تخلصه ولو مكنتش فطرت افطر واحمل شوية تمارين استريتشات عشان التوتر يقل ولو تعرف تنزل تتمشى شوية .. اشتغل على التوتر وازاي تقلله بدل ما تشتغل على محاربة الأفكار في دماغك ولو مكنتش نمت روح نام وقول لنفسك هنام نص ساعة بس وهصحى واظبط المنبه على الوقت اللي انت محتاج تصحى فيه مش بعد نص ساعة بس قول لعقلك انك أكيد هتصحى لوحدك من غير منبه لأنك متوتر وحاول تهدي نفسك بتمارين تنفس ممكن تساعدك وعموما استعين بالله .. انت بس محتاج تروح الامتحان كذا مرة من غير ما تكون مذاكر ليلتها عشان تعرف ان الدنيا سهلة