محتاجه رايكم في حاجه دلوقتي أنا مرتبطه ب شاب و هو فعلا شاب كويس جدا و محترم و راجل بمعني الكلمه بس احنا لسه بندرس يعني صغيرين علي أننا نخلي الموضوع ده حلال ، ف بابا عرف اني بكلمه و اتصل عليه و قاله اتفضل و اقعد معايا و هو بالفعل تاني يوم قعد مع بابا وملخص كلام بابا أننا لسه صغيرين و من وجهه نظره أن كلها سنتين تلاته و يزهق و يسيبني ف كان رأي بابا أننا نبعد و لما يكون جاهز و لسه عايزني يجي و يتقدم عارفه أن بابا معاه حق و أنه كلام مظبوط جدا بس المشكله في قلبي ، مش قادره ابعد عنه ولا اتخيل يوم وهو بعيد عني بجد انسان محترم اوي و داعم كبير ليا و انسان متفهم جدا و واعي يعني ماشاء الله ف دلوقتي هو عايز قرار مني أنا لو هبعد عنه ولا هعمل ايه وانا مش عارفه اعمل اي خايفه اختار بقلبي و اندم و في نفس الوقت رافضه فكره اني ابعد ف ياريت تقولولي رايكم في الموضوع وانا هعمل بالنصيحه بجد و شكرا
والدك دا راجل عاقل وفاهم دماغ الشاب كويس جدا لأنه مر بالمرحلة دي ف أكيد عارف الدنيا ماشية ازاي وعموما هو اختار الأصلحلك واسمعي كلامه واللي انتي بتحبيه دا لو بيحبك فعلا هيسعى إنه يجهز نفسه ويرجعلك
ربنا يبارك ف والد حضرتك راجل متفهم وعاقل جدا ورأيه فعلا هو الأصح من باب الدين دا الي المفروض يتعمل ومن باب الأدب وإن والدك كلمك وكلمه بالحسنى وبالطريقة الكويسة دي ف فعلا انت لازم تبعدي وإن كان ليكم نصيب ف بعض كلها سنتين او تلاتة وهيكون الموضوع رسمي ونصيحة من أخ ليكي ما لا ينال برضا الله لا ينال بمعصيته ف ابعدي واحتسبوا لله وربنا يجمعكم تاني بالحلال
بصي لو هو من نصيبك اكيد هيبقا ليكي حتى لو اي كده بس خليه يبقا لكي بالحلال وحياتكم تبقا سعيده بدل ما تبقا وحشه يعني انتي لو كملتي كده وبعدين اتجوزتوا صدقني هتبقا حياتكم مش حلوه علشان انتوا خلاص طلعتوا كل مشاعركم لبعض وكمان علشان ربنا من ترك شيئا لله عوضه الله بالاحسن وادعي ديما انه يبقا ليكي لقدر الله انتوا دلوقتي لو فضلوا تتكلموا وحصل بينكم مشكله وسبتوا بعض هتبقا استنزفتي قلبك ومشاعرك ودينك وكل حاجه وغير كده القلوب بين اصبع من أصابع الرحمن يقلبها كيف يشاء وانتي متعرفيش بكره في اي وربنا يجبر بقلبكم وان شاءالله ربنا يكرمكم وتكونا لبعض واسمعي كلام والدك وان شاءالله خير
والدك احترمك واحترم مشاعرك ومشاعره مينفعش ترجعي تخونيه تاني الاب دا مثالي، ويعني هو عمل الصح ولا كنتي هتعرفي تختاري لما يهب*دك علقه وميحترمش مشاعرك ولا مشاعره؟ وقتها كنتي هتعرفي تحددي؟
الله يصلح حالك 🤍
ابوكي صح و تعامل مع الوضع بعقلانية كبييرة و احترم حياتك الشخصية و مشاعرك لكن حتى يثبتلك انه صح لازم مسألة وقت قولي ربي ارني الصواب من الخطأ إني اوكلتك امري و قلبي ولو الشاب دا ماكانش بيحبك ماكانش هيتكلم مع ابوكي لو كان بيتمصخر عليكي اما موضوع الشاب كان داعم و حافز ليكي فهنا لازم تتحكمي في نفسك لأنه هذه ثغرات فيك لازم تمليها بأنك تشجعي نفسك بنفسك و متستنيش الناس التانية تدعمك