أنا داخل على شغل جديد، وده أول شغل في حياتي تقريباً، وأنا مش متعود على أي حاجة من دي. المشكلة إن مفيش أي معلومة واضحة. أمي قالتلي إن قريب ليا هيشغلني معاه، لكن معرفش اسم الشركة، معرفش عنوانها، مش عارف هروح إزاي، ولا حتى هلبس إيه. أمي قالتلي إن اليوم بـ 300 جنيه، وإن الشغل من 6 الصبح لـ 2 الظهر، لكن كل ده مش مؤكد، وهي نفسها مش متأكدة. حاولت أجيب صاحبي يشتغل معايا عشان مبقاش لوحدي، لكن أبوه رفض، وهو مش عارف حاجة برضو عن المكان. أمي قالتلي إن قريبنا هياخدني معاه في العربية، لكن لما سألتها تاني، طلعت مش عارفة، ولسه هتسأله. يعني هي أصلاً مقالتلهوش، وكل الكلام اللي قلتهولي كان مجرد تخمين. المعلومات ناقصة، حاسس إني داخل على حاجة مش واضحة، وده مخليني متوتر ومتعصب. مش عارف البس إيه، ولا هروح إزاي، ولا حتى هسأل مين لما أوصل. ومش عارف إذا كنت هروح مع صاحبي ولا لأ، ولا هلاقي حد يستقبلني هناك. معرفش حاجة، وده أكثر حاجة مضايقاني.