هي مش خيانة بشكل مباشر بس حسيت انها صدمتني وكسرتني هي كانت زميلة ليا في الجامعة قريبة مني جدا نعرف عن بعض حرفيا حاجات كتير اوي بنحكي لبعض مشاكلنا ونحلها سوا حرفيا كانت مساحتي الآمنة اللي بقدر اقول فيها كل اللي جوايا من غير ما اقلق الصراحة حسيت ناحيتها بمشاعر حب وتعلق ومبقتش شايف غيرها مرة واحدة بعتتلي مش هينفع نكمل كلام عشان حصل مشكلة عندي في البيت والجو ده وانا عشان معملهاش مشكلة وعشان متتئذيش بسببي فا فضلت متابعها من بعيد وهي كل ده متعرفش اي حاجة عن مشاعري ناحيتها بقيت براقبها على السوشيال ميديا من بعيد في الجامعة في مكان شغلها من بعيد لبعيد المهم بس اني كنت اشوفها فا لما جت فرصة عشان اروح اعترفلها واروح اتقدملها واحدة اعرفها جريت وقالتلها اخر كلمة ممكن تتقال لبنت حسستها انها بنت مش كويسة راحت تقولها انتي بترتبطي قالتلها انتي بتقولي اي راحت تقولها اني عايز ارتبط بيها مع ان ده عكس كل اللي انا عايز اقوله اكيد كنت هقول بطريقة اشيك من كده فا طبعا جالي الرفض وانا معرفتش اصارحها بكل اللي جوايا يمكن كانت تفهم صح فا حتى السلام من بعيد اللي كان بينا انتهى وبعتت لواحدة نعرفها سوا قالتلها قوليله ميفكرش في حاجة زي دي تاني ولو الموضوع اتفتح بينكم وبين بعض حتى هتزعلوا مني فا قفلت الموضوع وانا قلبي بيتقطع حرفيا ولحد دلوقتي مش مستوعب بس بعدها بفترة لقيتها بعد ما قالت انها ملهاش كلام مع شباب خالص عشان ثقة باباها لقيتها قاعدة مع واحد انا اعرفه وبتتصور معاه وبيهزوا سوا ويضحكوا وبعدها لقيتها قاعدة على طرابيزة في كافيتيرا الجامعة مفهاش بنت غيرها مع خمس شباب طبعا انا اتصدمت ومصدقتش عارف انها متتصنفش خيانة اوي بس ده الاحساس اللي وصلني واحساسي بالصدمة لأني مكنتش اتوقع منها كده الموضوع ده عدى عليه اكتر من سنة لحد دلوقتي وانا لسة متعلق بيها بفكر فيها علطول وبحلم بيها وبشوفها دايما في احلامي بسيناريوهات مختلفة فا بجد كسرتني ومشيت ولا همها
حاسه بوجعك بجد ومتفهمة قد ايه اللي حصل كان صعب عليك خصوصا انك كنت متعلق بيها وواثق فيها وبتحكيلها حاجات كتير ومعتبرها شخص قريب منك ولما الصورة اللي كانت في بالك اتغيرت طبيعي تحس بصدمة كبيرة بس متقساش على نفسك اكتر من كده هي رفضتك من البداية ومكانش بينكم ارتباط فعلي عشان يبقى اللي حصل خيانة قد ما هو خيبة امل ووجع ناتج عن التعلق الشديد بيها خد حقك في الزعل بس متخليش حياتك كلها تقف عند الموقف ده ولا تفضل مستني اجابات لكل حاجة ساعات الناس بتطلع مختلفة عن اللي كنا متخيلينه وده بيوجع فعلا لكن مش معناه ان قيمتك قلت او انك مش هتلاقي حد يقدرك بالشكل اللي تستحقه حاول تدي لنفسك وقت وتركز في حياتك اكتر ومع الايام الوجع هيخف حتى لو دلوقتي حاسس انه كبير اوي ❤️
حاسه بيك ، اولا ربنا بعدك عنها و خلاك تشوف الصوره كامله ف في أوقات كتير بيكون الابتلاء نعمه مش بندرك معناها غير بعدين ، خد وقتك في الزعل و امسح اي حاجه تفكرك بيها و بطل تراقب و امسك ورقه وقلم و اكتب الحاجات اللي مش بتحبها فيها علشان كل لما تحس انك هتحن اقراها و انت هتفتكر اللي حصل ، و في حاجات كمان طلع الزعل اللي جواك كله و اتكلم عن الموضوع كتير عادي هنا في التطبيق لان ده هيخفف من زعلك ووجعك شويه و قرب من ربنا و قوله يارب عوضني و نسيني و صدقتي هتنسي ، اكيد مش هتنسي اللحظات الحلوه بس علي الاقل الوجع هيخف و هتنساه بعد فتره ، وربنا يعوض قلبك يارب