انا انعزلت عن العالم كله سبع سنين وكام شهر عزلة تامة .. مش بروح دروس ولا مدارس ومش بخرج غير وقت الامتحانات وبس وكنت بخرج مرة كل شهر مثلاً اشم هوا وارجع تاني .. بعيداً عن الأسباب اللي وصلتني لكدا واللي مقدرش احكيها بس انا رجعت للعالم من كام يوم .. حلقت شعري ودقني طويلة شوية وأول مرة أخد بالي بس ملامحي بقت حادة زيادة عن اللزوم ومش عايز أهزر مع حد وببتسم بس وهدومي سودا وبقيت هادي زيادة عن الطبيعي والناس حاسس انهم باصين عليا شوية مش عارف عشان مختفي بقالي كتير مثلاً .. بعيداً عن صراعاتي الأزلية مع امي بس لقيتها بتقولي حساك استرجلت وبقيت راجل بقالك كام شهر كدا وشخصيتك بقت أقوي بكتير اوي من اي وقت فات وكلامك ونبرة صوتك وشكلك كل حاجة فيك اتغيرت بس للأحسن .. فرحت شوية بس أنا راجع للعالم مفلس حب وفلوس وكل حاجة بالمعني الحرفي والعيال اللي كانت معايا معرفش راحوا فين والبت اتخطبت وبتاع بس كل دا مهزش فيا حاجة .. مشكلتي حالياً ان ثقتي معدومة ف البشر عموماً عشان انا شخص امي سلمتني للحكومة بإيديها وقالتلي لا اعمامك ولا اخوالك ولا انا هقف جنبك بس ربنا لطف بحالي وعدت بس من وقتها وانا مبثقش ف خيالي ومقدرش اسيب لحد مسافة يقرب مني ومش عايز أقرب من حد أو مش عارف اثق ف اي حد ممكن اقابله او يحب يعرفني أكتر .. متلخبط لسة شوية بس دي حاجة مقدرش اخليها تبان ولو ف عيوني حتي ف أنا الفترة دي معرفش المفروض اتعامل ازاي وازاي أقدر أرجع نفسي تاني وخصوصاً ان حتي لسة هحاول اتعرف علي ناس جديدة معرفش ازاي بس أنا قبل كدا كنت قافل الباب دا خالص بس حالياً انا فاتح بابي ومعنديش مشكلة استقبل ناس جديدة بس بردوا لسة حته الثقة مش سهل إني اتعامل معاها وكمان نفسياً لسة واقع او جروحي بتنزف لسة ودا أقرب مثال لحالتي ولسة نفسياً مش جاهز اوي ف مش فاهم حالتي اوي خصوصاً إن مفيش حد يوجهني ومقدرش أتكلم ف اي حاجة مع اي حد ف الواقع وبردوا راجع مفيش مخلوق ف حياتي بالمعني الحرفي ف بحاول لسة و أي حد عنده أي نصيحة أو أي حاجة ممكن تفرق معايا ف الوقت دا ياريت يقولها وهكون شاكر جداً وشكراً لو حد قدر يكمل الكلام لحد هنا