السلام عليكم، عندي مشكلة بقالي فترة طويله ومش عارف أحلها. أنا خايف جدًا من فكرة الشغل نفسه. كل ما أفكر أشتغل أو أبدأ أدور على شغل، أحس بتوتر شديد وقلق وأحيانًا ضيق تنفس. حتى لو الشغل بسيط أو جزئي، دماغي بيبدأ يفكر في أسوأ السيناريوهات: "هتعب، هصحى بدري، مش هعرف أنام كويس، هفقد حريتي، اتفاعل مع ناس ...الخ الخ الخ" الغريب إني مش خايف من الشغل نفسه بس، أنا خايف من الروتين، من الصحيان بدري، من إني أقعد ساعات في مكان مش مريح، ومن إني أفقد الوقت اللي بعمله في حاجات أنا بحبها (حتى لو دلوقتي مش بعمل حاجة أصلاً). جربت أقنع نفسي كتير، وقلت "هجرب يومين بس"، بس التسويف والخوف بيغلبوني كل مرة. حتى لما أشوف إعلانات شغل، أقفلها على طول. عايز أعرف: حد مر بنفس الخوف ده ونجح يبدأ شغل؟ إزاي قدرت تتغلب على الخوف من الروتين والصحيان بدري؟ فيه نصيحة عملية جربتها ونفعت معاك؟ أنا فعلاً محتاج أسمع تجارب حقيقية، لأني واصلت لمرحلة إني خايف حتى أفكر في الموضوع. شكرًا لأي حد هيرد.