السلام عليكم انا شاب في أولى جامعة وانا صغير كنت طفل هادي و غلبان ومش بعرف اكون صداقات ودي صفات مينفعش تتصف فيها في مدرسة حكومية فكنت بتعرض للتنمر كتير وكنت بنضرب اكتر وبتتاخد سندوتشاتي وبيسرقوا نظارتي ومقلمتي يعني كل حاجة ممكن تكره الواحد في عيشته في مرة كنت نازل اجيب حاجة من البقال اللي جنب البيت ٢ جم ضربوني علقة وقعت منهم في الأرض كملوا عليا برجولهم وتفوا عليا وانا كان أول مرة اشوفهم ساعتها واخر مرة لاني مشوفتهمش تاني المهم عدت الايام ودخلت الثانوي وعملت اصدقاء ومعارف الحمد لله ودخلت الجامعة وهكذا ومن تعاملي الناس كلها بتحبني وبتحترمني ونادرا لما يحصل مشكلة مع أي حد مشكلتي لما تحصل مشكلة مع أي حد سواء اعرفه او لا ببقى خايف ومرعوب ورجلي مش شايلاني وممكن بنسبة كبيرة أتنازل لو ليا حق لمجرد اني خايف اخش في مشكلة أو في خناقة احساسي لسه من جوايا اني هتضرب زي وانا صغير احساسي لسه ان لا انا مش قد اللي قدامي بغض النظر انا فعلا قده او لا بس الاحساس صعب احساس العجز رغم ممكن مكونش عاجز واقدر اخد حقي بس خوفي بيمنعني احساس صعب جدا وبيخلي الواحد يضايق من نفسه جدا وساعات بيجي في بالي اني لازم اخش مرة في خناقة عشان اثبت لنفسي اني اقدر اخد حقي عادي دائما بتراجع في آخر لحظة دايما شجاعتي بتحركني لحد اخر لحظة ومش بقدر اكمل احساس مضايقني اوي برغم قلة المشاكل في حياتي دلوقتي الحمد لله بس مفيش حياة بتخلوا من المشاكل ولو مفيش دلوقتي احتمال يكون في بعدين وللاسف غالبا مش هقدر اعمل حاجة برضه
بلاش تحاول تدخل في مشاكل قاصد ، انت عندك ميزة انك مبتعملش مشاكل و الناس بتحبك ف خليها زي ما هي بس اتعلم تكون قوي الشخصيه مع الوقت في مواقف صغيرة مش شرط خناقات يعني لو حصل حاجه انت مش غلطان فيها مش مجبور تعتذر لو حصل موقف فيه قلة احترام لا وقفهم عند حدهم ب احترام لو حصل مشكله، مش لازم ترد في نفس الثانيه، ارجع البيت، فكر مع نفسك في المشكله من اولها ل اخرها، انت غلطان؟ اعتذر، مش غلطان؟ متعتذرش و ابعد عن الشخص الي عمل المشكله اتعلم فن التخلي عن الناس، خلي عندك طاقة ان الناس هم الي محتاجينك مش انت الي محتاجهم مع الوقت هتزيد ثقتك في نفسك و تعرف ترد عادي و تاخد حقك ب احترام
لو تعرف تلعب رياضه قتاليه العب، بيكون في حاجز خوف عند اي حد بس بيضرب كتير او بيتخانق كتير و ده طبيعي
لو جاتلك المشكلة واجها هتفشل مرة والتانية وطالما عندك رغبة للتغيير يبقي في مرة هتنفجر وهتقدر فماستسلمش وحاول واكسر خوفك علشان تعرف تعيش باقي حياتك راضي ومبسوط
حاول تنزل جيم صدقني هيديك ثقه شويه حاول بش بهزر معاك انا بكلمك جد لان في حد اعرفه كان عنده نفس مشكلتك لما راح جيم موضوع ظبط معاه
بنت وفاهماك بجد ومريت بحاجات واكتر مشابهه ، روح لدكتور نفسي بجد عشان يعالج التروما دي ... الضرب مش حل بس زمان كان شلة وانت كنت بطولك وهما هيتحاسبوا علفكره ... ايا كان ركز علي انك تتعافي وبس ، الحل مش انك تضرب وتتخانق وتاخد حقك بالعكس انت بتجيب عليك الغلط ... دا بداية تفكير عدواني وتلاقيك في خيالك بتحاول تفكر في خناقه وتدرب نفسك تقريبا ومش اكيد بس انا كدا ، لكن دا بيزود العداء وتخلي طول الوقت مستني غلطه او بتدافع عن نفسك في وقت غلط ومحدش بيكون فاهم انك مكبوت وحاجات كدا بجد الدكتور نفسي مع علاج هيظبط الدنيا ويكاد يكون اصلا هتنسي المشكلة دا مش هتنسي بالمعني الحرفي لكن هتتخطاها لما تيجي علي بالك مش هتقدر تحكي تفاصيل اساسا وهتكون بلا مشاعر او احساس انك عايز تعيط او حاجة يعني الموضوع هيكون برود والخوف هيختفي بالتدريج عن تجربة والله بس الخوف دا يعني هو لسه ملازمني بس بحاول اتظاهر بعكس دا لحد ما هتظبط يعني وقرب من ربنا بجد واذكر ربنا كتير واهدي واهدي وخليك مع القرآن واقرأ بجد في الدين شويه هتفهم امور كتير ازاي تتعامل مع المشكلات وردة الفعل ...