عندي مشكلة ما فهمتهاش إلا بعد حوالي 6 سنين من بدايتها. وأنا في أولى إعدادي اتعرفت على بنت عن طريق صاحب ليا. البنت دي كانت محترمة جدًا، محترمة لدرجة إنها ما كانتش بتتكلم أو تهزر مع أي حد. في الوقت ده كنت شخص مختلف تمامًا؛ كنت مشترك في أكتر من نادي، بعمل موسيقى، متفوق دراسيًا، وعندي طموحات وأهداف واضحة. مع الوقت حصل إعجاب متبادل بيني وبينها، ومن هنا بدأت حياتنا تتغير بشكل كبير. هي اتغيرت عن شخصيتها الأولى، وأنا كمان اتغيرت. دخلنا في علاقة استمرت حوالي 6 سنين، وخلال الفترة دي بدأت حاجات كتير في حياتي تتدهور. بقيت أضيع وقتي، وأهمل أهدافي وطموحاتي، ووصلت لمرحلة إني بقيت أعمل أي حاجة من غير ما أفكر إذا كانت صح أو غلط. بقيت متعلق بيها جدًا لدرجة إن وجودها بقى المصدر الأساسي لأي شعور بالراحة أو السعادة عندي. السنة اللي فاتت سبنا بعض، لكن من وقتها وأنا حاسس إني فقدت القدرة على الاستمتاع بأي حاجة. مش قادر أستمتع بعلاقة جديدة، ولا حتى بحاجات كنت بحبها زمان. بقيت حاسس إن جزء كبير مني متعلق بيها تحديدًا، لأنها كانت الشخص الوحيد اللي يعرف كل تفاصيل حياتي وأسراري والحاجات اللي بحبها. دلوقتي أنا داخل رابعة كلية، وبحاول أفهم إزاي أرجع للشخص اللي كنت عليه زمان، وإزاي أتخلص من التأثير اللي لسه موجود جوايا بعد كل السنين دي. مش عارف أعمل إيه، لكن حابب أسمع رأي أي حد ممكن يكون مر بحاجة مشابهة أو عنده نصيحة تساعدني أرجع أبني نفسي من جديد. كمان من الحاجات اللي مصعبة عليا الموضوع إن علاقتي بيها كانت عميقة جدًا على المستوى العاطفي، وكنت بحس معاها براحة وتفاهم ما حسيتوش مع أي حد تاني. وهي شاطرة، ومع الوقت بقيت أربط السعادة والاحتواء وراحة البال بوجودها هي، وده خلاني بعد ما سبنا بعض أحس إن مفيش شخص أو أي حاجة تقدر تعوض الإحساس ده. وده من الأسباب اللي مخليني لحد دلوقتي متأثر بالعلاقة ومش قادر أستمتع بالحياة أو أبني ارتباط جديد بنفس السهولة رغم انى مبحبهاش ومش عايزها.