"كل شيء بدأ بالشمس.. كنت فاكرة إني بسأله 'واقف في الشمس ليه؟' خوفاً عليه، مكنتش أعرف إن سؤالي ده كان بداية الحريق اللي هيآكل قلبي وسنيني. من اللحظة دي، بدأت أبيع.. بعت أغلى ما أملك، بعت أهلي، سندي، الناس اللي شالوني في عيونهم، رخصتهم عشان واحد 'بارد'، واحد مبيعرفش يعني إيه لهفة، ولا يعني إيه روح بتتحرق عشان كلمة منه. كنت بستنى رده أسبوع، والوجع بياكل فيا، وهو؟ كان بيرد ببرود يقتل، كأنه بيمنّ عليا بكلمة. عشقتُه لدرجة العبودية، لدرجة إني كنت بشوف إهانته ليا 'نصيب'، وكسرته لقلبي 'قدر'. كنت ببكي بدل الدموع دم، بجد دم، من القهر اللي حاسة بيه وأنا شيفاه بيحاول يبعد، ولما يرجع يقولي 'أصلك بتصعبي عليا'.. الكلمة دي كانت بتدبحني أكتر من غيابه. أنا مش شحاتة مشاعر، أنا كنت ملكة ورخصت نفسي عشان سراب. وصلت لمرحلة إني قطعت شراييني.. شوفت دمي بيسيل قدام عيني وقولت يمكن لما يشوف موتي يحس، يمكن غروره يتكسر ويجي يطمن. بس لا، الغرور عنده كان جبل مبيتهزش، سابني بتموت ومهنش عليه حتى يرفع سماعة التليفون. هدمت نفسي، هدمت مستقبلي، هدمت علاقتي بأهلي اللي قولت لهم في وشهم: 'أبيعكم وأبيع الدنيا علشانه'.. ياريتني م قولت، ياريت الأرض انشقت وبلعتني قبل ما أرخصهم عشان حد مبيسواش. والقهر الحقيقي؟ إني لسه لليوم ده، لسه قلبي الخاين ده بيدق لما بيشوف اسمه. بكتب استورياتي بوجعي، بدموعي، بكسرتي، وهو بيدخل يشوفها بكل برود، ويحط 'لايك'.. 'لايك' على جرحي؟ 'لايك' على دمي اللي اتصفى؟ كأن وجعي ده فيلم بيتفرج عليه وبيعجبه الإخراج. أنا بموت في اليوم ألف مرة وهو لسه عايش في برجه العالي، مستمتع بكوني لسه 'مرقبة' ولسه 'مقهورة'. أنا ضيعت كرامتي على سلم مدرسة، ودفنت روحي في 'شات' مكنش فيه غير وجع