مش عارف أبدأ منين بصراحة، بس حاسس إني تعبت جدًا من إني شايل كل حاجة لوحدي طول الوقت. أنا في تالتة ثانوي علمي رياضة، وبمر بفترة صعبة جدًا نفسيًا ودراسيًا. بعاني من إدمان الإباحية والعادة من سنين، وحاولت كثير أتعافى وأقوم، وفي كل مرة أقع بحس إني بتكسر أكثر من اللي قبلها. وصلت قبل كده لفترة طويلة نوعًا ما من غيرها، وحسيت وقتها إن الحياة بدأت ترجعلي شوية، لكن بعد كده اكتشفت إني كنت مجرد بهرب من كل حاجة ومبعد نفسي عن الضغط، مش بتعافى فعلًا. الموضوع مأثر على تركيزي ونفسيتي ودراستي بشكل كبير جدًا، وبقيت أوقات كثيرة حتى الحاجات اللي كنت بحبها مبقتش حاسس بطعمها. وعندي شعور دائم بالوحدة والفراغ والتعب النفسي، خصوصًا بعد وفاة والدتي من سنين وأنا صغير، ومن وقتها تقريبًا وأنا حاسس إن جوايا احتياج كبير للاهتمام والاحتواء والأمان، وبفضل أكتم وأحاول أبان عادي لكن من جوايا مرهق جدًا. أوقات كثيرة بحس إني تايه ومش عارف أبدأ صح منين، وكل ما أحاول أنظم حياتي أو أذاكر أو أقف على رجلي بحس إن فيه حمل فوقي أكبر مني. ومع إني بحاول أقاوم وأقوم كل مرة، لكن الوحدة صعبة جدًا فعلًا. يمكن أكتر حاجة محتاجها دلوقتي هي إني أحس إني مش لوحدي في كل ده. نفسي ألاقي حد كويس نتساعد في الدراسة ونشجع بعض، أو حتى حد أتكلم معاه شوية من غير ما أحس إني لازم أمثل إني بخير طول الوقت. ولو حد مر بحاجة شبه كده أو يقدر يساعد ولو بكلمة أو نصيحة أو حتى وجود، هكون ممتن جدًا فعلًا.
انت الي بتعمله إنجاز متستهونش بيه
لو اذنبت توب ولو اذنبت توب ولو اذنبت توب حتى لو كررت الذنب مليون مرة لحد ما ربنا يتوب عليك اهم حاجة لا تيأس ومتخليش الشيطان ينتصر عليك
وحاول تفهم ليه بتعمل كده في الأصل هل ضغوط بتفرغها بالطريقة دي ولا مجرد شعور شهوة ولا إيه بالظبت. ثانيا لو مش بتلعب رياضة جرب تلعب رياضة لو تقدر او تروح جيم او حتى تجري كده لو الصبح بدري حتى وحدك وميبقاش حد معاك واجري بحريتك مثلا ده هيفرغ طاقتك وهمك وضيقك كتير. لو معاك أصحاب سوء حاول تبعد عنهم. لما تلاقي نفسك بتمارس العادة او بتتفرج على الاباحية مثلا جرب تغير مكان او طريقة قعدتك لو مستلقي اتعدل لو معدول اقف هكذا يعني ولو الحوار ده بيحصل لما تكون وحدك بس جرب متفضلش وحدك كتير يعني اطلع اقعد مع اهلك او امشي في الشارع في الهوا او اخرج مع صحبة كويسة تكون مش بتشجعك لاي حاجه تضرك. متضغطش على نفسك في المذاكرة أوي حتى لو هتذاكر خمس دقائق بس بجدية وتكون فهمت معلومة صح أهم حاجة بس تبدأ وبعد ما تبدأ الخمسه هتبقى عشرة والعشرة ربع ساعة والربع يبقى نص وإن شاء الله تلحق تخلص ووضعك يبقى أحسن بكتير. وقرب من ربنا كتير وتوب حتى لو وقعت كتير ربنا دائما فاتح باب التوبة...لو مهموم ومتضايق جرب تصلي مثلاً أو تقرا قران ده هيريحك. ولو تقدر تتواصل مع مختص نفسي ده هيكون أحسن بكتير.
واضح إنك شايل ضغط كبير من سنين خصوصًا بعد وفاة والدتك وده شيء صعب جدًا على أي حد. ويبدو انك بتشعر بالم ووحده حقيقين وضعوط كتيره عليك... فاهمه ومقدره تماماً الإحباط إلي بيجي من فكرة أننا بنحاول ونقوم ونرجع نقع ويمكن بنقع ونتكسر اكتر وكده بس ده طبيعي لاننا بشر وكل البشر بيغلطو محدش معصوم من الخطأ. بس أنت مش محتاج تكون مثالي... انت انسان وبشر. كلنا بنغلط ونتعلم ونقوم ونقع ونرجع لنقطة الصفر ونقوم ونقع ونكمل... ربنا بيقوينا لما نكون عايزين نتغير بجد للأفضل. مامتك حتى لو توفت ومبقتش معاك في الدنيا من وانت صغير ف يكفي إن ذكراها لسه في قلبك... لأنها حتى لو مبقتش موجودة في عالمك بجسدها المادي فهي موجودة في قلبك لأن مشاعرك ليها حقيقية وذكراها لسه في قلبك. وعلى فكره أنت بطل عشان قدرت تصارح نفسك قبل اي حد بالمشاكل إلي عندك دي وانك شجاع بما يكفي عشان تشاركها مع حد حتى لو بشكل مجهول..متستهونش أبدا بالانجاز إلي أنت بتعمله ده.