مش كل طفل اتربى في بيت كان عايش في أمان. في أطفال اتعرضوا لإهانات مستمرة كسرت ثقتهم بنفسهم، وفي اللي اتعرضوا لعنف جسدي خلّاهم يكبروا وهم خايفين، وفي اللي عاشوا إساءات جنسية من أشخاص كان المفروض يكونوا مصدر الحماية والأمان، المؤلم إن آثار الحاجات دي مش بتختفي بمجرد ما الإنسان يكبر. أحيانًا بتفضل موجودة في صورة خوف، أو قلق، أو صعوبة في الثقة بالناس، أو شعور مستمر بعدم الاستحقاق. جروح الطفولة ممكن تكبر مع صاحبها لو ما لقتش احتواء أو فهم أو فرصة للتعافي، عشان كده مهم نفتكر إن مش كل شخص بيضحك مرتاح، ومش كل شخص ساكت بخير. في ناس شايلة وجع سنين طويلة بسبب أذى اتعرضت له وهي صغيرة. ولو في حد مرّ أو بيمر بحاجة زي دي وحابب يتكلم أو يشارك تجربته، أنا موجود أسمع له وأدعمه على قد ما أقدر، من غير أحكام ومن غير ما أقلل من اللي مرّ بيه.