يمكن لو كانت الأيام أرحم بقلب الإنسان أكتر من كدا.. كان عرف يعيش بروحه وبنفسه هو زى م بيحلم .. كان هيبقى خفيف لان طبيعته متشافة من عيون حابة طبيعته ف بتزيده ثقة انه جميل هو عارف انه جميل بس كان محتاج يتشاف من عيون يشوف فيها جماله زى المراية.. كان عرف يلون ايامه بألوانه المفضلة ورتب كل حاجة حواليه ع زوقه وباسلوبه الى محدش لسة يعرف هما اد ايه مبهرين.. كان زاد حياته الصغيرة حلاوة ونور هو مكانش مهتم بالحياة الكبيرة هو كان كفاية عليه عالم صغير مقفول عليه هو وعيون شيفاه طول الوقت ..لو كان بس خاف أقل شوية.. وقرر انه يداري خوفه دا ورا شخصية ظاهرها I don't care فى نص بحبه اوى ل د. راقية جلال.. بتقول "أنت لستَ حُلما لأحدٍ.. لكنك تغنم عز المغنمة إن أكرمك الزمان بلقاء من يشتري ورد جمالك المُلتحف بأشواك عيوبك، فيقول هذا الجميل حبيبي وهذه الأشواك أحبها لأنها تحميه. مسكينٌ المُحِبُ.. كل مُحبٍ مسكين.. وغانمٌ كلُّ محبوب. " الشخص دا كان بيسأل نفسه سؤال انا لو كنت فتحت الباب ايه الضمانة اننا منتوجعش او نفتح لحد غلط فتفضل ندبة جوانا طول العمر ف الانسان قرر ف لحظة ما يختفى ويتقوقع ع نفسه لدرجة ان محدش يحس انه عايش كان بيعاقب نفسه ؟ ممكن! او كان بيحاول يعودها ع قساوة الحياة عشان المرة الجاية لو الحياة قررت توجعه يبصلها بإستهزاء ويطلعلها لسانه ويقولها موجعتنيش وكأن هو دا التارجيت الى جى الحياة عشان يحققه .. يمكن الدنيا مش بشعة للدرجادى بس هو الى قلبه رقيق زيادة عن اللزوم ومش عارف يشرح داازاى ف بيسكت ويبتسم ابتسامه خفيفه ولما يبقى لوحده يفضل يبكي كل كلمة معرفش يشرحها.. يمكن كان محتاج حد متأكد أكتر منه.. او حد يصبر ع باب خوفه لحد م يزول..