لو انا اتكتب عليا الوحدة أعمل اية ابويا منفصل عن والدتي من وانا عندي سنتين، امي اغلب الوقت في الشغل وعايش لوحدي، عمري مدخلت علاقة في حياتي، معنديش خالات، معنديش عيلة حرفيا عيلة امي عمري مشوفت حد فيهم، عيلة ابويا كل واحد في وادي وبرضو معرفهمش حتى ليا عم وعمة توفوا وعمري مشوفتهم، ساكن في عمارة أغلبها فاضي ومفيش جيران صحابي قليلين والعيد قضيتو لوحدي أو في الشغل ويعتبر معنديش حد أخرج معاه لما باجي أخرج بتكون كلها صدفة حد مثلا جاي منطقتي يقولي انا جاي فاستقبله أو العكس بعد شغل حد يقولي تعالا نقعد على القهوة فاروح نقعد ساعتين وشكرا لكن معنديش الناس اللي أخرج معاهم على طول. حاولت كتير أدخل في علاقة مجال شغلي أغلبه رجالة للأسف باجي ساعات الاقي بنات تطلب مني مساعدة ويدوني رقمهم ويسجلوني أسأل انتي عندك كام سنة ألاقيها اكبر بسنين ومتخرجة وانا لسة بدرس دراستي بعيدة عن محافظتي ساعتين ونص ومش بروح الا على الامتحانات وبرضو اغلب الكلية رجالة. اعمل ايه العيد كان صعب أوي أوي عليا كله مع صحابه وقرايبو وانا حتى أبويا مقاليش كل سنة وانت طيب يا حبيبي، بشوف كله بياخد عداية إلا أنا مليش حد يقول كل سنة وانت طيب حتى، بقيت مخنوق من الموضوع ده وبتكلم فيه كتير ومليت انا بدرس واشتغل زي اي حد لكن لوحدي. تفكك أسري دائرة اجتماعية صغيرة أهلي ميعرفوش حتى انا شغال فين ولا اية مقر شغلي ولا اي حاجة. زهقت من كتر الوحدة معرفش أنا عملت اية عشان أبقى كده وكل محد يعرف انا شغال اية يستغرب ازاي شغلانتي دي لوحدي رغم أن أساسها العلاقات بس انا لوحدي ممكن اصحى اه الاقي 10 رسايل بس كلها في الشغل من أشخاص مختلفين ولما أكون في إجازة ملاقيش أي إتصالات ولا حد يسأل، بلاقي على الناس مصاحبة بعضها من أيام ابتدائي إلا أنا مش فاكر حد ومش معايا أرقام ولا اسماء متذكرها، بقى نفسي اني اخش في علاقة عشان اعوض الحرمان ده حرمان عاطفي وجفاف وتفكك أسري مش طبيعي وبقيت ازهق وأغلب الوقت يا في الشغل يا على القهوة لوحدي.