أحد أغرب العلاقات اللي الإنسان ممكن يتحط بيها هي نوع العلاقة اللي بيتحط لها قواعد و قوانين صارمة و تنبيهات و تحذيرات مستمرة العلاقة اللي دايما محسساك بالقرب بس فى نفس الوقت مشيلاك ذنب القرب دا وهنا أنا بتكلم عن صديقة دخلت حياتي بشكل مفاجئ سريع جدا غير مفهوم و غير مبرر وخليني أوضح لك ان دا كان اول ريد فلاج المفروض أنتبه ليه لأنه اتكرر معايا أكتر من مرة وكشخص مش عاوز يعمم شئ عشان ميحصلش قولبة نمطية الا ان السلوك دا غالبا بيظهر من نفس النمط اللي بيجي ينبهر بيك و بالهالة اللي حواليك فيبقى عاوز يكون صديقك و يحس انه تحدي انه يكسبك بس أول ما يفوز بال game ويكسبك يحس بالملل و يكتشف الجانب الانساني الضعيف فيزهق *لا اراديا بالمناسبة* بكل بساطة هو تنافسي بطبيعته و محتاج شخص بيجاري على نفس طاقته ال ٢٤ ساعة و فى نفس الوقت ممكن يكون بيحبك جدا عادي بس الحب هنا معادش كفاية لأنه يكون مهتم بالعلاقة دي فيبدأ يحط للعلاقة قواعد و قوانين يثبت لنفسه بيها أنه هو المتحكم فى العلاقة بشكل عقلاني تام و ان مش مشاعره هي اللي محركاه لأن guess what? هو شايف المشاعر عار عليه مش شئ بشري طبيعي علاقة من النوع دا مهما كان الطرف التاني بيحبك و متمسك بيك فهي علاقة بتستنزف الطاقة لأنك محتاج تحلل كل تصرف و كلمة و تمشي حسب رغباته و ردود فعلك نفسها تبقى متماشية مع الردود اللي هو محتاجها ، يعني من الاخر مش دايما هتعرف تبقى على طبيعتك و بما ان صديقتي الحالية هي تاني شخص اقبله بالمشكلة دي ،و رغم انها أنضج و تعتبر شخص متفهم جدا و للآن ممسكتش عليها غلطة إلا إنى واقفة فى موضوع حيرة هل أنا بعمل إسقاط عليها بسبب صديقتي السابقة؟ ولا هي فعلا بتستنزفني وانا مش حسة ؟ ولا دي شوية مشاعر نتيجة الضغط ؟ ولا أنا بأوفر ثينك و بس؟ فحابة أعرف بجد ، امتى بنقدر نحدد هو احنا قادرين نتعامل مع الشخص دا و لا الشخص دا مش مناسب لينا لأن حاليا الأذى مش هو المقياس الا ان القلق المستمر هو اللي تاعبني احساس دائم بعدم استقرار العلاقة و اللي مخليني مش عارفة احدد هل أنا بعاني من قلق حاد ؟ ولا المشكلة فى العلاقات نفسها و الأنماط اللي بختارها كأصدقاء؟