من أصعب القرارات إنك تلاقي جوا عقلك خناقة بين اختيارين… والاتنين صح، بس عواقبهم مختلفة. خصوصًا لما الموضوع يخص أهلك. أنا مدمن متعافي بقالـي 6 سنين وشهرين بالظبط… والحمد لله ولا مرة انتكست. لكن الغريب إن أصعب حاجة مش كانت التعافي… أصعب حاجة كانت نظرة الناس بعد التعافي. لحد دلوقتي، أول ما حد يعرف إني كنت مدمن… بيبصلي كأني خطر، كأني جربان. مع إن محدش شاف مني أذى، ولا موقف وحش. المؤلم بجد إن اللي المفروض يكونوا ضهرك… كانوا سبب إنك تضيع سنين من عمرك. وحتى لما حاولت تلحق نفسك وتقف على رجلك… اتخلوا عنك. أنا عايش لوحدي من وأنا عندي 19 سنة. ورغم كل ده… أنا دلوقتي اللي واقف جنب أمي في مرضها، وبخدمها… مش عشان حاجة غير صلة الرحم وحقها عليا. لكن كل مرة… نفس الكلام. نفس الاتهام. "مدمن… وحرامي". وصلت لمرحلة بقى صعب عليا أسمع الكلمة دي تاني. نفسي أمشي وأرجع بيتي وأعيش في هدوء… وفي نفس الوقت ضميري مش سامحلي أسيبها لوحدها. وساعات بحس إن أصعب معركة مش مع الإدمان… أصعب معركة مع الصورة اللي الناس مصممة تفضل شايفاها فيك… حتى بعد ما اتغيرت.. التعافي علمني اعيش من غير مخدرات . بس محدش علمني ازاي اعيش وسط ناس مصممه تحبسك في شخصيه قديمه منك ..