الفترة دي بقيت بفكر في حاجة كتير. هل فعلًا الإنسان يقدر يعيش لوحده طول الوقت؟ أنا طول عمري تقريبًا بقنع نفسي إني لازم أعتمد على نفسي، وإن الاحتياج لحد ضعف، وإني لازم أكون قوي مهما حصل. لكن بصراحة... وصلت لمرحلة حاسس فيها إن الوحدة نفسها بقت بتستنزفني. من فترة قصيرة كان فيه ناس في حياتي، مجرد كلام عادي، حد أفضفض معاه، حد يسمعني، حد يقولي: "إزيك؟" الغريب إن وجودهم فرق معايا جدًا. كنت أهدى، وأخف، وحاسس إن الحمل اللي جوايا مش كله على كتفي. ولما مشوا... رجعت أقنع نفسي من جديد: "متحتاجش حد." "اعتمد على نفسك." "أنت كويس لوحدك." لكن الحقيقة إني مش عارف. أنا مش بطلب إن حد يشيل عني حياتي. ولا بدور على علاقة أهرب فيها من وحدتي. أنا بس أوقات ببقى محتاج حضن... أو كلمة تطمن قلبي... أو حد يربت على كتفي ويقولي: "أنا معاك." وأول ما أعترف بالإحساس ده، ألاقي نفسي ألومها وأقول: "لا... مينفعش... استحمل." فأفضل عايش بين صوتين. صوت بيقول إن الإنسان محتاج ناس. وصوت تاني بيقول إن لازم تكمل لوحدك. يمكن عشان كده أنا تعبت. مش من الوحدة نفسها... لكن من إني طول الوقت بحارب احتياجي الطبيعي لأي دعم أو احتواء. وبدعي ربنا إن يرزقني في الوقت المناسب ناس صادقة، أكون بينهم على طبيعتي، من غير خوف، ومن غير ما أحس إني حمل على حد. لحد ما ييجي الوقت ده... هحاول أكمل، حتى لو بخطوات صغيرة. وربنا يهون على كل قلب بيحارب في صمت.