اتعرفت على بنت وأنا بدرس دراسات عليا، وحبينا بعض، وفضلنا مع بعض حوالي 3 سنين. كنت بحاول أبني نفسي وأدخل البيت من بابه، لكن الظروف كانت صعبة، من فقدان شغل، ونصب، وديون، ومع ذلك مكمل عشانها. خلال العلاقة بدأت أشوف تصرفات وتناقضات وغياب مفاجئ ورسائل بتتمسح وتبريرات متغيرة، وكل مرة كنت باختار أصدقها وأكمل. اتقدمت رسمي، واتفقنا على الخطوبة، لكن الشك فضل موجود. بعد فترة اكتشفت حاجات خلتني أفقد الثقة تمامًا، وانتهت العلاقة. النهارده عدّى على الانفصال كام شهر، ولسه الوجع موجود. أصعب حاجة مش إن العلاقة انتهت، أصعب حاجة إن الشخص اللي كنت شايفه شريك حياتك يطلع غير الصورة اللي رسمتها في خيالك. مش بدور على انتقام، ولا عايز أؤذي حد، لكن لسه بتعلم إزاي أتعافى وأرجع أثق في نفسي من جديد.