السلام عليكم 🍭. غيرت الوردة خلاص لازم نغيَّر زهقنا 🤚🏻. المهم، هي مشكلتي عبارة عن تساؤل شوية للأمانة. ليه كل ما نيجي نتعامل مع البشر بيقرروا يثبتولنا سوءهم اكتر؟ تدي لحد الامان والثقة، يخونها. تساعد حد وتعامله بإحترام، يعتبره حق مكتسب ويهين فيك. تعامل حد بحدود لما خلاص تزهق من الناس، يقول عليك معقد او يكرهك رغم ان ده الطبيعي. المشكلة ده بيحصل لكبار وصغار، وناس من كل الفئات.. انت اعطيت؟ اه ده من حقي اصلا، ويبدأ يهين لمجرد انك اتعاملت بأصلك. يعني اللي أثار الموضوع ده اوي ف بالي، ان ماما كانت بتتعامل مع اهل بابا بكل اصل وذوق وتعمل اللي مش من واجبها، لحد ما اعتبروه حق مكتسب وبقوا يتبلوا عليها عند بابا. حقها مأخدتهوش الا بعد سنيين لما ربنا كشف لبابا حقيقتهم، كان في الاول يقولها كبري دماغك وعادي، لحد ما طفل منهم اتبلى عليه وشتم اخويا الصغير وضربه ضرب قوي والكبار منهم اهانونا قدامه. ف ببدأ ادرك، او افهم، ان كل ما تدي الناس تطمع فيك اكتر، مش تقنع وتسكت، لا تحس انهم هياكلوك، عايزين ياخدوا منك كل قطرة دم فيك.. طب اتعاملت بالرينج الطبيعي؟ لا انت متخلف ومعقد ومثلا ازاي متجيبيش معاكي لينا؟ المفروض انا اللي بعزمك والله مش حضرتك اللي بتعزمي نفسك. يعني افتكر موقف لواحدة من صحابي، كل ما امشي معاها اشتريلها اكل وعصاير وو.. وحتى اعياد ميلادها كنت بجيبلها هدايا بمبالغ كبيرة.. في عيد ميلادي جابتلي هدية مكملتش ال٨٠ جنيه تقريبا، وانا والله م مشكلتي في الهدية ولا سعرها، انا يهمني قيمتها المعنوية اكتر بكتير، انا مشكلتي انها راحت تتفاخر مع واحدة صحبتنا تالتة برخص الهدية، وبعدها علطول جابت اوردر سكين كير ب٢٠٠٠ جنيه واكدت على سعره كتير اوي معايا، ولما مشينا مرة وانا كنت ناسية محفظتي، والله راحت جابت لنفسها اللي تشربه وولا سألتني وكنا حرر وهي ماشية معايا وبتشرب ولا ع بالها. طب انتي عايزة تثبتيلي ايه؟ توصليلي يعني انك اعلى مني وكده؟ المشكلة لو على كده وهنتكبر بقى على بعض، ف انا اعلى منك ماديا واجتماعيا وعلميا، ف ده انتي اللي محتاجة تتملقيني يا هانم. الموضوع ليه حيثيات اكبر من كده زي الحسد، وانها اي حد مهتم بيها تحاول تلفت انتباهه سواء كان معجب او واحدة صحبتي وتحاول تخطفه مني بأي شكل، ولو معرفتش تقول انه بيبصلها مثلا هي او ان علاقتها بالبنت قد ايه حلوة، او تقعد تشتم فيهم شتايم بجد سيئة واللي هو انا اللي رافضاكوا لصلا مش انتوا اللي مش معبريني، المهم انها يا تاخد اللي معايا، يا لو معرفتش تقعد تشتم فيه وتحقر منه. اللي مش قادرة افهمه انه كانت بتغير عليا قبل ما تصاحبني اصلا وكانت هتموت على ده، طب ليه لما مش عايزاني داخلة حياتي تحرقي دمي وخارجة؟ ده بيوصلني في الآخر لاني اكره التعامل مع البشر، ويبقى حد يشتكي ويقول عليا مغرورة بقى؛ مهو اصل من القرف اللي بشوفه. وآسفة على الاطالة عموما، كنت بفضفض بس.