محتاج رأيكم بجد عشان أنا تعبت ومش عارف أفهم أنا فين. أنا مرتبط ببنت بقالنا حوالي 3 سنين، والعلاقة بينا كانت جد وفي كلام في الجواز، وفعلاً كنت ناوي أخد خطوة رسمي في 2026. في الفترة الأخيرة بدأت أحس بعدم راحة، وكان في بُعد منها وتقلب في تعاملها، يوم قريبة جدًا ويوم بعيدة، وده كان مسببلي توتر. حصل موقف مهم جدًا: في يوم بليل بعتتلي شوية رسائل واتمسحت بسرعة، وأنا لحقت أقراها قبل ما تتمسح، وكان فيها كلام زي: "كنت بكلمك قبل ما أنام" "كنت هعدي عليك امبارح ولا عايز تعملها لوحدك" والكلام ده مكنش ينفع يتقال ليا، فده خلاني أشك إن الرسائل دي كانت لشخص تاني واتبعتتلي بالغلط. لما واجهتها، مادتش تفسير ثابت: مرة قالت سوء فهم، مرة قالت حد غيرها كتب، مرة دخلت الموضوع في حوار اختراق، ومرة قالت إن في فلوس اتسحبت من فودافون كاش وكلام زي كده. في نفس الوقت، في شخص في حياتها كلامها عنه كان متناقض جدًا: مرة تقول زميل، مرة تقول مدير، مرة تقول جار، مرة تقول في شغل مستمر بينهم، ومرة تقول إنه واخد منها فلوس أو ناصب عليها. كمان حصل موقف قبل كده في 2024 إنها عملت جروب ضمّني أنا والشخص ده وهي ووالدتها، وبعدها قالت إن والدتها شافت الجروب ومسحت كل حاجة، ورجعت تكلمني باعتذار رسمي، وده خلاني أشك أكتر إن في حاجة كانت بتحاول تخبيها. كمان كانت بتبعتله لينكات (فيديوهات أو مشاكل علاقات) وده خلاني مستغرب لو فعلاً مجرد زميل عادي. وفي يوم لما تقابلنا في كافيه (24 مارس)، طلبت أشوف الموبايل، سحبته بسرعة من إيدي وقعدت تقلب فيه، وقالت جملة غريبة: "أنا ست مش كويسة"، وبعدها رجعت في كلامها، وحاولت تنهي القعدة بسرعة وتمشي. بعد كده بدأت تعمل بلوكات على فترات، مرة على واتساب، مرة على مكالمات، مرة على سوشيال ميديا، وفي نفس الوقت ساعات ترجع تكلمني عادي. وفي مرة قالت عايزين ناخد “أجازة من بعض خالص”. كمان لاحظت إنها أوقات بتكون في مكالمات لفترات طويلة جدًا ومبتردش عليا، وده زود الشك عندي. من ناحية تانية، هي بتيجي المدينه اللي انا فيها مرة في الأسبوع ع الاقل ، ومع ذلك عمرها تقريبًا ما بتحاولش تشوفني هناك. آخر حاجة حصلت إنها بعتتلي “صباح الخير” على تليجرام، وأنا رديت بشكل عادي، لكن لما حاولت أكلمها بعد كده مردتش، وده خلاني أحس إني أنا اللي بجري وراها وهي مش مهتمة بنفس الدرجة. أنا حاليًا تايه بين حاجتين: هل كل ده ممكن يكون ضغط نفسي وتوتر منها وسوء تفاهم؟ ولا في فعلاً حاجة بتحصل من ورايا وأنا مش واخد بالي؟ أنا لسه بحبها، بس في نفس الوقت تعبان جدًا ومش حاسس بأمان. ولو حد مكاني، يكمل ويحاول يفهم الحقيقة؟ ولا ينسحب ويحافظ على نفسه؟