محتاج رأيكم بجد عشان تعبت ومش عارف أوصل للحقيقة. أنا شاب عندي 27 سنة، مرتبط ببنت بقالنا حوالي 3 سنين، وكان المفروض الموضوع يتطور لجواز. أنا كنت متمسك جدًا وكنت بحاول أكون موجود معاها على طول، حتى على حساب نفسي. من بدري كنت ناوي أتقدملها بس ظروفي مكانتش مستقرة، فاتفقنا إني أجهز نفسي، لكن من وقتها العلاقة بقت شد وجذب، تقرب وتبعد بشكل متكرر. خلال الفترة دي حصلتلي مشاكل مادية واتنصب عليا، وكنت بحاول أقف على رجلي تاني، ولما الأمور بدأت تتحسن واتفقنا على خطوة جد، حصل موقف غريب جدًا. في يوم بالليل: - كان في بينا كلام عادي - بعدها مكالمة - بعدها في خلال دقيقتين تقريبًا اتبعت حوالي 10–11 رسالة واتمسحوا فورًا (ظهر عندي تم إلغاء الإرسال)، وأنا كنت قاريهم قبل ما يتمسحوا أهم جملتين كانوا: "أنا كنت بكلمك قبل ما أنام" "كنت هعدي عليك امبارح ولا عايز تعملها لوحدك؟" بعدها كملت كلام عادي معايا، وبعد آخر رسالة مني الرسائل دي اتمسحت. لما واجهتها: - قالت سوء فهم - وبعدها قالت إن أختها ممكن تكون هي اللي كتبت - وبعدها الموضوع دخل في قصة اختراق وسحب فلوس وكان في تناقضات قبل كده في موضوع شخص معين في حياتها: مرة تقول زميل، مرة مدير، مرة مفيش حاجة، ومرة في شغل مستمر بينهم. قررت أقابلها وطلبت أشوف موبايلها: - مسكته لحظة وسحبته بسرعة - قعدت تقلب فيه بشكل واضح - وورتني الماسنجر بسرعة - واكتشفت إنها عاملالي حظر رسايل لما سألتها: - قالت إنها اتكسفت - وقالت جملة "أنا ست مش كويسة" - وبعدها رجعت قالت إنها معملتش حاجة حاولت تنهي القعدة بسرعة وتمشي. بعد كده: - طلبت ناخد أجازة خالص - عملتلي بلوكات على أغلب المنصات - وحتى لما والدي كلمها يسأل على والدها التعبان، عملتله بلوك، وقالت إنها مخنوقة ومش طايقة حد مع إن اتضح إن كلامها عن حالة والدها فيه تناقض (مرة عناية ومرة لا، ومواعيد مختلفة) وفي نفس الوقت: - ساعات بتكون في مكالمات طويلة ومش بترد - وفي تصرفات فيها تناقض واضح كمان عندها من فترة مشاكل صحية: - اضطرابات هرمونية - وجع بطن مستمر - قيء متكرر - ومشاكل نسائية من فترة أنا حاليًا تايه: - مفيش دليل قاطع على خيانة - لكن في حاجات كتير مقلقة - وثقتي فيها اتأثرت جدًا أنا مش عايز أظلمها، لكن مش قادر أتجاهل كل ده. السؤال: هل ده ممكن يكون كله ضغط نفسي ومشاكل صحية وسوء تفاهم؟ ولا في حاجة فعلاً مش طبيعية؟ ولو مكاني… تكمل ولا تنهي؟