أنا حاسس إن الوحدة مكتوبة عليا غصب عني، مش اختيار مني خالص أبويا وأمي منفصلين من وأنا عندي سنتين، ومن ساعتها وأنا تقريبًا عايش لوحدي أمي أغلب وقتها في الشغل، وأنا طول الوقت بين أربع حيطان، لا في حد أكلمه ولا حد أخرج معاه إلا لو صدفة زي أن حد قابلتو بعد شغل قالي يلا أو حد من سنين كلمني بالصدفة بتكون كل فين وفين ممكن السنة كلها من مرتين ل4. عمري ما دخلت علاقة عاطفية، ولا حتى حسيت إحساس إن في حد قريب مني بجد معنديش خالات أصلاً، وعيلة أمي أنا مشوفتش حد منهم طول حياتي وعيلة أبويا؟ كل واحد في حاله، ومفيش بينا أي تواصل، حتى عمي وعمتي ماتوا وأنا معرفهمش ولا شفتهم وقريب كنت في زيارة شوفت ولاد عمتي لاول مرة وكل واحد اختفى تاني. ساكن في عمارة كأنها مهجورة، أغلبها فاضي، ومفيش جيران ولا حد حتى تسلّم عليه صحابي؟ قليلين جدًا، والخروج معاهم مش حاجة ثابتة، مرة كل شهرين تلاتة بالعافية ولو خرجت بيكون الموضوع كله صدفة حد معدي في منطقتي يقولي تعالا أقعد معايا، أو بعد الشغل حد يقولي نروح القهوة، نقعد ساعتين وخلاص كل واحد يرجع لحياته، كأن مفيش حاجة. مفيش عندي دايرة صحاب حقيقية، مفيش الناس اللي تقول عليهم "شلة" أو "صحبة دايمة". كله مؤقت، كله عابر. شغلي أونلاين نزوله قليل وده زوّد الموضوع صعوبة حتى لما بنتجمع، كل واحد في وادي، حاولت كتير أقرب الناس لبعض، أقولهم تعالوا نقعد، نعمل حاجة سوا، مفيش. كله بيقولك "ربنا يسهل" ويفكس، مرة كان في اجتماع، قولت دي فرصة حلوة نقعد بعده، لقيت كل واحد اختفى ومشي لوحده، حتى الشغل اللي المفروض يقرّب الناس، بقى سبب زيادة الوحدة. جربت أدخل علاقة عاطفية عشان أعوض الفراغ ده بس مفيش فرصة. شغلي كله رجالة تقريبًا ولو في بنت كلمتني بتكون عايزة مساعدة، وأخد رقمها وأحاول أفتح كلام، ألاقيها أكبر مني بسنين ومرحلة تانية خالص وأنا لسه بدرس، وكليتي أصلاً في محافظة تانية، بسافرلها وقت الامتحانات بس، وحتى هناك أغلبهم رجالة. العيد بقى كان تقيل بشكل مش طبيعي الناس كلها مع أهلها وصحابها، وأنا لوحدي حتى أبويا ما قاليش "كل سنة وإنت طيب". مفيش حد عبرني بالكلمة دي بشوف الناس بتاخد عيديات وتضحك وتخرج، وأنا ولا كأن ليا حد في الدنيا. بقيت مخنوق من الإحساس ده إني عايش زي أي حد، بدرس وبشتغل وبحاول أعمل حاجة في حياتي، بس لوحدي خالص. مفيش حد عارف أنا بشتغل إيه ولا بعمل إيه. أهلي نفسهم ميعرفوش عني حاجة لكن عشان اديهم حقهم مش مقصرين معايا ماديا نهائي ومصاريف كويسة مفيش تقصير الغريب بقى إن شغلي أساسه علاقات، والناس تستغرب إزاي أنا شغال فيه وأنا لوحدي ممكن أصحى ألاقي 10 رسايل، بس كلها شغل أول ما أكون فاضي، مفيش ولا رسالة، مفيش ولا حد يسأل عليا موبايلات كتير جدا ورسائل كتير جدا بس برضو لوحدي محدش في الشغل يعرف انا كلية اية اصلا ولا اهلي نفسهم بيعرفو بس عشان لما ابعتلهم جدول الامتحانات وينسو بحس إن الناس كلها عندها أصحاب من زمان، من ابتدائي وإعدادي، وأنا ولا فاكر حد ولا معايا أرقام ولا حتى ذكريات كأني ابتديت حياتي لوحدي كده من غير مقدمات. بقيت نفسي أدخل في علاقة مش حب بس… لا، عشان أعوض الحرمان ده. حرمان عاطفي، وحدة، تفكك أسري… إحساس إنك مالكش حد خالص. بقيت أزهق من كل حاجة… معظم وقتي يا شغال، يا قاعد على القهوة لوحدي، بس مش عارف أخرج من الدايرة دي. دايما بسأل نفسي فين جدي وجدتي من ناحية الأم والاب؟ دول ماتو قبل منا اتولد طب فين خالاتي معنديش طب عماتي جزء متوفي وجزء مقاطعينهم، طب ولادهم؟ منعرفش جزء جزء كل كام سنة نشوفهم مرة، طب ولاد ولادهم؟ نفس القصة طب عمامي؟ واحد متوفي مشوفتوش وواحد كل فين وفين وكل دول مش معايا ارقامهم حتى