مشكلتي غريبة شويا عشان مسمعتش حد بيتكلم عنها مع اني حد طبيعي والله. انا مسلمة، أزهرية، اتربيت تربية سليمة عادي. ديما بتجيلي أفكار، انو اي الحياة دي؟ يعني اي كل حاجة حوليا. اه انا عارفه ان ربنا خلقنا وخلق الكون وهي دي الحياة. مقدرش اشك ان في خالق، لان دا هيعقد ويرعب أكتر. بس انا، مش فاهمه يعني اي او ازاي. مش قادرة افهم حسه بالظبط.. نفس إحساس راجل اتاخد من العصر الحجري فجأة ل عالم خارق للطبيعة مثلا، قدامو ادله لكل شيء، وكل حاجة حواليه تعتبر هي الطبيعي بس بالنسبالو خارقه، مش قادر يصدقها. اه انا مش قادرة اصدق اني كائن شايف من عينيه وبيكتب ع الفون دلوقتي. مش متخيله يعني اي كل الناس والكوكب الكبير دا موجود والاكبر كمان هو اللي لسه مشفتوش.. ان في موت وحياة كمان بعد الموت كلها حجات لا تصدق زي اني لو دخلت الجنة مثلا يعني.. مذ هموت ابدا هبقا موجودة للأبد! انا مش بعرف اصلي، مش بعرف التزم بالدين. مع ان جوايا بحس ان كل دا صح وكل دا جميل ومريح للقلب. بس حسه اني بعمل حاجه لمجرد ان شكلها مريح والكل بيعملها.. مش قادره افهم اي دا، يعني اي صلاة، يعني اي؟ هو في اله بجد؟ انا مش بنكر والله.. انا لو انكرت ان في اله هترعب اكتر. امال كل الكون دا جه منين؟ دي مجرد افكار بتيجيلي من حين ل آخر ولو سيطرت عليا فجأة.. بتجيلي لحظه هلع مقدرش اخرج منها غير لما الهي نفسي بسرعه ب اي حاجه تانيه. مش عارفه اعمل اي. مش عارفه انا محتاجه افهم اي بالظبط.
متسبيش فرصة لدماغك تودي وتجيب ابدأي ف تعلم العقيد وخصوصا باب الأسماء والصفات والذات الإلهية ، تعرفي على الباب دا هيشيل عنك شبهات كتير وأنصحك بسماع د هيثم طلعت في باب تفنيد الشبهات اللهم أرها الحق حقا وارزقها اتباعه وأرها الباطل باطلا وارزقها اجتنابه وإياي والمسلمين
تخيلي معايا إنك بنيتي عالم كامل من مكعبات الأطفال..... و عملتي شخصيات صغيره من المكعبات دي.... إنتي الي اخترتي اشكالها و احجامها و الوانها... و بطريقة ما خليتي المكعبات دي تقدر تتحرك و تفكر بنظام أنت الي برمجتيها عليه...... أنتي شايفه المكعبات كلها.... و عارفه هما بيفكروا ازاي... و هيعملوا ايه.... بس هما مش عارفين انك موجوده.... ولا حتي يقدروا يستوعبوا حاجه زي كدا الا لو انتي برمجتيهم علي كدا...... هما شغالين ببرمجتهم بيعملوا الي هما عاوزينه.... منهم الي بيعمل كويس و منهم الي بيعمل وحش.... و أنت عارفه ده و ده و مبرمجه ال 2..... ممكن في اي وقت تدمريهم كلهم.... او تدمري حد و تسيبي الباقي.... مهما كانت الطريقه.... بس لو انت مش موجوده! هما مين الي كان هيصنعهم؟...... في فكره بحاول أوصلها.. . بس زي ما هو واضح فوق 👆 طريقتي في التوضيح غريبة شوية. 😅 أنا حاليا في ثانوي أزهر😶🌫️ و بناخد حاجات تخلي الواحد فعلا يفكر افكار غريبه 🫤 خصوصا في التوحيد 🙃 بس الي اقدر اعمله اني أفضل فاكر جملة: "فكروا في كل شيء و لا تفكروا في ذات الله" ربنا موجود بس عقلنا الصغير غير قادر علي إدراك الذات الإلاهيه
انتى محتاجه تقراي اكتر عن الدين بس من الواضح برضه انك عندك معلومات كتير بس خلي ديما فى تفكيرك انك لازم تبعدى عن التفكير فى ذات الله عشان ترتاحى خليكى ديما بتفكرى انك ازاى تعملى الاعمال اللى تخليكى قريبه من ربنا مش تفكير فى البعد او ازاى دا موحود
ادراكك يدل انك مش سطحيه ودا كويس ، مش منكره وجود خالق بدليل كلامك وانبهارك بعظمة خلقه من كلمة مش مصدقه ان انا انسان بتنفس وبكتب ع الفون وان الكون دا كله موجود ، بتتكاسلي عن الصلاه بعض الاوقات عشان مش عايزه تبقي ورا القطيع اللي هو كله بيعمل كدا اعمل زيه انتي محتاجه تتعرفي على دينك اكتر ، مهما كان علمك في ناس كانت كويسه والحدت من كثرة التفكير وجهي تفكيرك دا صح يعني افهمي الحكمه من الصلاه ايه ونزلت امتا وليه واقراي في الدين واسالي شيوخ وهتوصلي لحته كويسه جدا في الدين لان عقليتك واضح انها ما شاء الله قابله للتعلم وتقبلي النصيحه وتفكيرك ذكي ربنا ينفعك وينفع بكِ وبعتذر لو تحليلي خاطئ
محتاجة تفهمي القرآن